Propostas en 5 anos

 Boa tarde! 

Estas semanas estivemos a facer moitas cousiñas na nosa aula: rematamos o proxecto do inverno descubrindo Oymyakon, o lugar habitado onde vai máis frío, e fixemos as portadas dos traballos estampando limóns e laranxas con pintura. Tamén houbo tempo para degustar algunhas pezas! 

Pola Semana da Prensa realizamos unha sección do tempo para o noso periódico dixital, traballando previamente as partes que compoñen un periódico e creando a nosa noticia. 

Para celebrar o Día da Felicidade trouxemos imaxes sobre aquilo que nos fai felices e, como non podía ser doutra forma, estar coas nosas familias foi a máis repetida ❤️

Nos últimos días tamén nos está gustando escribir nos folios os nomes das nenas e nenos da aula de xeito espontáneo, que ben o pasamos!

Ivó trouxo o ngoni, un instrumento de música propio de Senegal. Ensinounos a tocalo, e agora encántanos empregalo no momento da relaxación para a volta á calma tras o patio. Moitas grazas, pasámolo fenomenal!! 

Ademais o venres tivemos unha visita moi especial: o papá de Mariña acudiu á nosa aula con Mbay, que naceu en Senegal e contounos cosas moi interesantes! 

Nós tiñamos algunhas preguntas preparadas, e durante a súa visita falounos das comidas típicas senegalesas, froitas propias desa zona, vestimenta… e ensinounos como se din algunhas palabras na lingua wólof! 

Moitas grazas por compartir este tempiño con nós!

Para rematar deixamos unhas imaxes da nosa visita á horta, onde plantamos xirasoles.